Шымкент қаласында тазалық мәселесіне қатысты заң бұзушылықтармен күрес күшейтілуде. Қаладағы қоғамдық орындарда қоқыс тастау, құрылыс қалдықтарын рұқсатсыз тастау сынды әрекеттерге жауапкершілік арттырылып, заң бұзушыларға айыппұл салынатын болады.
Шымкент қаласының Тұран ауданына қарасты Қазығұрт шағын ауданында өткен рейд барысында тұрмыстық қалдықтарды бейберекет төгу фактілері жиілеп кеткені анықталды. Полиция қызметкерлері мен қоғамдық белсенділер бірігіп өткізген шарада заңсыз әрекеттер анықталды. Қала тұрғындары, негізінен, құрылыс және тұрмыстық қалдықтарды көшелер мен бос жерлерге тастайды. Бұл жағдайлар экологияға үлкен зиян келтіріп қана қоймай, қаланың көркіне де кері әсерін тигізуде.
Шымкент қаласының әкімдігі мен жергілікті полиция органдары осы мәселеге қарсы күресті күшейтті. Бұл бағытта учаскелік инспекторлар күн сайын мониторинг жүргізіп, заң бұзушыларды анықтауда.
1–14 тамыз аралығында Шымкент қаласында «Таза Қазақстан» республикалық экологиялық акциясы аясында «Таза Қала» атты профилактикалық іс-шара өтуде. Шараның негізгі мақсаты – қала аумағында санитарлық тазалықты сақтау, қоғамдық тәртіп пен тыныштықты қамтамасыз ету, сондай-ақ тұрғындардың экологиялық және құқықтық мәдениетін арттыру.
Рейдтік жұмыстар Шымкент қалалық полиция департаменті мен қала әкімдігі бірлесіп ұйымдастыруымен өткізілуде. Нәтижесінде, бірқатар азаматтар мен кәсіпкерлік нысандардың иелері санитариялық талаптарды сақтамағаны үшін әкімшілік жауапкершілікке тартылды. Сонымен қатар, қоғамдық орындарда тыныштықты бұзған тұлғаларға да заң шеңберінде шара қолданылды.
Шара аясында аулалар мен көшелерге, саябақтар мен скверлерге, жалпыға ортақ пайдаланылатын орындардың тазалығына ерекше мән берілуде.
Құзырлы органдар қала тұрғындарын тұрмыстық қалдықтарды арнайы орындарға тастауға, тазалық пен тәртіпті сақтауға және айналадағылардың тыныштығын құрметтеуге шақырады.
Шымкентте тазалық сақтауға жауапкершілікті арттыру мақсатында жергілікті әкімдік пен құқық қорғаушы органдар бірлесіп жұмыс істеуде. «Қала тұрғындары өз учаскелерін таза ұстауы қажет. Бұл тек айыппұлдан қорқу емес, ортақ жауапкершілік пен мәдениеттің көрінісі болуы тиіс», — деп атап өтті полицейлер.
Қалалық коммуналдық қызметтер мен қоқыс шығару компанияларының жұмысы да жаңартылып, қалдықтарды шығару мәселелері бойынша жаңа әдістер енгізілуде. Әкімдік қолайлы жағдайлар жасау арқылы тазалықты сақтауға қажетті инфрақұрылымды жақсартуға бағытталған шараларды жоспарлап отыр.
Шымкенттегі тазалық сақтау мәселесі тек айыппұлмен шектелмей, азаматтық жауапкершілікті арттыруға бағытталған. Қала тұрғындары өз аумақтарын таза ұстау арқылы қала экологиясын қорғауға және оның эстетикалық келбетін сақтауға үлес қосуы қажет. Осы бағытта жүргізілген шаралар мен рейдтердің мақсаты — Шымкенттің таза әрі көрікті қала болуына ықпал ету.