Қоғамдық келісім мен ішкі тұрақтылық – кез келген мемлекеттің ең басты тірегі және ұлттың тұтастығын сақтаудың басты негізі болып табылады. Тарих сахнасынан белгілі болғандай, ішкі қақтығыстар мен алауыздықтардың кесірінен көптеген мемлекеттер өркениеттен кенде қалып, тіпті картаның бетінен жоғалып кетті. Ал бірлігі бекем, мақсат-мұраты ортақ елдер ғана кез келген дағдарыстан мүдірмей өтіп, жаңа белестерге қол жеткізді.
Қазақстан – көпұлтты, көптілді және мәдени әртүрлілігі мол мемлекет. Тәуелсіздік алған сәттен бастап еліміздің басты ұстанымы – халық бірлігін сақтау және нығайту болды. Мемлекет басшысы Қасым-Жомарт Тоқаевтың айтуынша, «Татулық пен келісім – еліміздің ең басты байлығы». Бұл қағида уақыт сынағына төтеп беріп қана қоймай, қазіргі жаһандық сын-қатерлер жағдайында одан сайын өзектілігін арттыруда.
Әлемдік тәжірибе көрсеткендей, тұрақтылық пен келісім бар ел ғана экономикалық өркендеуге қол жеткізеді. Инвестиция тарту, ірі инфрақұрылымдық жобаларды жүзеге асыру, инновациялық технологияларды енгізу – мұның бәрі сенімді, қауіпсіз және татулығы берік қоғамда ғана мүмкін болады. Қазақстанның соңғы онжылдықтағы экономикалық жетістіктері – ішкі тұрақтылықты сақтай алғанымыздың нақты дәлелі.
Бірлік пен татулықтың жоқтығында қандай да бір табиғи байлық немесе заманауи технология елдің дамуына септігін тигізе алмайды. Керісінше, алауыздық пен сенімсіздік барынша бар мүмкіндікті жойып жібереді. Сондықтан ынтымақты сақтау – тек әлеуметтік мәселе емес, мемлекеттің стратегиялық дамуының негізгі тетігі.
Мәдениет, ғылым, білім және өнер тек бейбіт әрі тұрақты ортада ғана гүлденеді. Қоғамда сенімсіздік пен дүрдараздық белең алған жағдайда шығармашылық тоқтап, инновациялар баяулайды. Ал бірлік пен өзара сыйластық бар елде әрбір азамат өзін қауіпсіз сезініп, өзінің барлық әлеуетін толық жүзеге асыра алады.
Қазақстан халқы Ассамблеясы, этномәдени бірлестіктер, жастар ұйымдары мен қоғамдық құрылымдар – барлығы да елдегі келісім мен татулықты нығайтуға елеулі үлес қосуда. Бұл міндет – тек мемлекет пен биліктің ғана емес, әрбір азаматтың жауапкершілігі.
Ынтымақ – бұл жай ғана сөз емес, ол күнделікті қарым-қатынастағы өзара сыйластық пен түсіністік, ортақ мақсаттар мен мүдделер үшін біріге білу қабілеті. Болашақ ұрпақ бізден тек экономикалық жетістіктерді емес, сонымен қатар, бірлікті сақтау дәстүрін де мұра етіп алуы тиіс.
Қазақстанның жарқын болашағы – халық бірлігінде. Ынтымақ пен келісімді сақтау – еліміздің өркендеуі мен дамуына апарар ең сенімді жол. Біз бірге күшті, біртұтас және гүлденген мемлекетті жасай аламыз.