30 тамыз – Қазақстан Республикасының Конституциясы күні. Бұл – елдің тұтастығын, қоғамның татулығын, азаматтардың құқықтары мен бостандықтарын айқындаған айрықша мереке. Осыған орай еліміздің әр өңірінде игілікті шаралар ұйымдастырылып, ортақ құндылықтарға құрмет көрсетілуде.
Шымкент қаласында да бұл мереке елеусіз қалмады. Конституция күні қарсаңында Ұлттық сапа орталығының Шымкент қалалық филиалының ұжымы қаладағы Ата заң көшесінде сенбілік ұйымдастырып, жұртшылыққа үлгі көрсетті. Бұл игі бастамаға филиал қызметкерлері мен қала тұрғындары белсене қатысып, көше бойын күл-қоқыстан тазалап, қураған шөп-шалам мен арамшөптерді орды. Сенбілік барысында қала көркіне көрік қосатын жасыл белдеулер де назардан тыс қалмады. Көшенің көркін кетіріп тұрған арамшөптер шабылып, айнала абаттандырылды. Қызметкерлер қолдарына тырма мен күрек алып, еңбектің нағыз үлгісін көрсетті. Бірлік пен ұйымшылдықтың арқасында бірнеше сағаттың ішінде Ата заң көшесі жаңаша түрге еніп, жайнап шыға келді.
Жолшылардың айтуынша, мұндай шаралар – тек бір реттік тазалық жұмысы емес, қоғамға үлгі болатын тәрбиелік мәні зор бастама. Олар өз ісі арқылы туған жерге, қоғамға деген жанашырлықты көрсетіп отыр.
«Конституция күні – еліміздің бірлігін, тұрақтылығын, азаматтарымыздың тең құқылығын паш ететін мереке. Ал тазалық – мәдениетті қоғамның көрінісі. Сондықтан бұл күнді игі іспен бастауды жөн көрдік. Бұл – біздің Отанға деген құрметіміздің бір белгісі», – дейді Шымкент қалалық филиалының қызметкерлері.
Ата заң – азаматтық жауапкершіліктің айнасы
Қазақстан Республикасының Конституциясы – Тәуелсіз Қазақстанның негізін қалаған басты құжат. Ол әрбір азаматқа тең құқық пен бостандықты, қоғамда бейбіт өмір сүруді қамтамасыз етеді. Ата заңымыздың арқасында елімізде құқықтық мемлекет құрылып, халықтың өмір сүру сапасы жақсарып келеді.
Мемлекеттік мерекені атап өтудің басты мағынасы – заң үстемдігін, ел ішіндегі татулық пен тұрақтылықты дәріптеу. Бұл тұрғыда қарапайым еңбек ұжымдарының, түрлі сала мамандарының осындай қоғамдық шараларға белсенді атсалысуы – азаматтық жауапкершіліктің жарқын көрінісі.
Ортақ іске – ортақ үлес
Шымкент қаласында экология мен тазалық мәселесіне айрықша мән беріліп отыр. Жергілікті әкімдік пен қоғам белсенділері қала аумағында сенбіліктер мен көгалдандыру акцияларын жиі ұйымдастырады. Ұлттық сапа орталығының жол саласындағы мамандары бұл үрдістен шет қалмай, өз үлестерін қосып келеді.
Ата заң күніне орай өткен сенбілік – тек тазалық шарасы ғана емес, қоғамның бірлігі мен ұйымшылдығын айғақтайтын азаматтық белсенділіктің үлгісі болды. Мұндай іс-шаралар жастарға тәрбие, ұжымдарға рух береді.