Шымкент қаласында «Таза Қазақстан» республикалық экологиялық акциясы аясында ауқымды сенбілік өтті. Бұл жолы қала тазалығына үлес қосу бастамасын мәдениет саласының қызметкерлері қолдап, ұйымшылдықтың, отансүйгіштіктің жарқын үлгісін көрсетті.
Сенбілікке Шымкент қалалық Мәдениет, тілдерді дамыту және архивтер басқармасының ұжымы мен басқармаға қарасты мәдениет мекемелерінің қызметкерлері белсене атсалысты. Қоғамдық маңызды іс-шараның басты мақсаты — қала аумағын қоқыстан тазарту ғана емес, сонымен қатар тұрғындар арасында экологиялық сана мен мәдениетті қалыптастыру, қоршаған ортаға деген жауапкершілікті арттыру болды.
Сенбілік жұмыстары Абай ауданына қарасты Сырым батыр көшесінің бойында жүргізілді. Бұл бағытты таңдаудағы негізгі мақсат — көпқабатты тұрғын үйлер орналасқан тығыз аумақты тазарту әрі қала тұрғындарына табиғатқа жанашырлықпен қарау идеясын тарату болды.
Ауқымды тазалық жұмыстарына елімізге танымал мәдениет және өнер қайраткерлері де белсенді қатысты. Олардың қатарында театр және кино актерлері, әншілер, шығармашылық жетекшілер мен мәдени орталықтардың басшылары болды. Белгілі тұлғалардың мұндай іс-шараларға қатысуы — қоғамға оң әсер етіп, қарапайым тұрғындарды ортақ іске жұмылдыруда маңызды рөл атқарады.
Жалпы сенбілікке 2000-ға жуық мәдениет қызметкері қатысты. Оның ішінде 500-ге жуық адам өздерінің қарасты мекемелер аумағын тазартуға жұмылдырылса, қалғандары қаланың орталық көшелерінде жұмыс атқарды. Іс-шараға 13 бірлік арнайы техника тартылды.
Күні бойы жүргізілген жұмыстардың нәтижесінде 28 тоннадан астам тұрмыстық және құрылыс қалдықтары жиналды. Оның ішінде 6 тоннасы мәдениет мекемелерінің аумағынан, ал 22 тонна қоқыс Сырым батыр көшесіндегі қоғамдық орындар мен жасыл желектердің маңынан шығарылды. Барлық қалдықтар арнайы техника көмегімен қалалық қоқыс полигондарына жеткізіліп, экологиялық талаптарға сай жойылды.
Мәдениет саласының қызметкерлері бұл бастаманы жай сенбілік емес, қоғамға экологиялық үндеу ретінде қарастырып отыр. «Таза орта — салауатты ұлттың кепілі» деген ұстаныммен атқарылған жұмыстар мәдениеттің тек сахна мен залда емес, табиғат пен қоршаған ортада да көрініс табуы қажет екенін дәлелдеді.
«Біз мәдениет саласының өкілдері ретінде тек өнерде ғана емес, күнделікті өмірде де қоғамға үлгі болуға тиіспіз. Қоршаған орта – біздің ортақ үйіміз. Оған жанашырлықпен қарау әрбір азаматтың парызы. Бұл сенбілік – біз үшін экологияға деген құрметтің нақты әрекетке айналған көрінісі», — деді басқарма өкілдері.
Шымкент қаласында бастау алған бұл сенбілік мәдениет саласының тазалық пен тәртіпке, қоршаған ортаға деген жоғары мәдениетін көрсетіп қана қоймай, бүкіл қала тұрғындарын осындай маңызды бастамаларға үн қосуға шақырды. Келешекте бұл игі шара жүйелі түрде өткізілетін дәстүрге айналмақ.
«Таза Қазақстан» аясында өткізілген бұл сенбілік — тек қаланы тазарту емес, қоғамды тәрбиелеу, бірлік пен ұйымшылдықты нығайту, азаматтық белсенділікті арттыру жолындағы нақты қадам. Мәдениет майталмандары көрсеткен бұл үлгі — ұрпақ санасында тазалық пен жауапкершілік мәдениетін қалыптастырудың жарқын көрінісі.
Таза қала – таза ойдың, таза рухтың мекені. Оны қалыптастыру – бәріміздің міндетіміз.