Қазақстанда экология мәселелері күн тәртібіндегі маңызды бағыттардың біріне айналып отыр. Осы орайда елімізде қолға алынған «Таза Қазақстан» жалпыұлттық акциясы — қоршаған ортаны қорғау, экологиялық тәрбие беру және ұрпақ санасына табиғатқа деген жанашырлықты сіңіруді көздейтін маңызды бастама. Бұл акция аясында еліміздің барлық өңірлерінде түрлі форматтағы шаралар өтуде. Аталған игі істен Шымкент қаласындағы білім ошақтары да шет қалмай, оқушылар арасында экологиялық мәдениетті қалыптастыруға белсенді түрде кірісуде.
Шымкент қаласындағы Ыбырай Алтынсарин атындағы №65 мектеп-гимназиясы – «Таза Қазақстан» акциясы шеңберінде экологиялық ашық сабақтар ұйымдастырып, жас буынға қоршаған ортаға деген жауапкершілікті үйретіп жүрген алдыңғы қатарлы мектептердің бірі. Бұл мектепте өткен “Таза Қазақстан – таза болашақ” атты іс-шара оқушылардың бойында табиғатқа деген сүйіспеншілік пен қамқорлықты арттыру мақсатында ұйымдастырылды. Аталған шара барысында бастауыш сынып оқушылары «Таза Қазақстан», «Таза аула», «Таза қала», «Таза үй» тақырыптарымен жұмыс істеді. Әрбір топ өз тақырыбын шығармашылық жолмен таныстырып, түрлі қолөнер бұйымдары, макеттер мен постерлер әзірледі. Бұл арқылы олар экологиялық мәселелерді өз көзқарастарымен бейнелеп, тұрмыстық қалдықтарды қалай азайтуға болатыны, қоршаған ортаны қалай таза ұстау керектігі туралы өз ойларын ортаға салды. Сонымен қатар, сабақта нақыл сөздер мен мақал-мәтелдер сайысы, экологиялық сұрақ-жауап ойындары ұйымдастырылып, оқушылар экологиялық білімдерін тәжірибе жүзінде көрсетті. Олар мақалдардың мәнін аша отырып, оны өмірмен байланыстыра білді, бұл – тек жаттау ғана емес, терең түсінік пен қоршаған ортаға қатысты саналы көзқарас қалыптастырудың белгісі.
Сынып жетекшісі Альмира Медетқызының айтуынша, оқушылар мұндай экологиялық шараларға үлкен қызығушылықпен қатысады. «Балалардың белсенділігі бізді қуантады. Олар өз ойларын еркін айтып, табиғатты қалай қорғау керектігі туралы ұсыныстарын білдірді. Бұл – тек тәрбие ғана емес, болашақ азаматтың санасын дұрыс қалыптастырудың жолы», – дейді ұстаз. Қазіргі таңда Ы.Алтынсарин атындағы №65 мектеп-гимназиясында 3400-ге жуық оқушы білім алуда. Мектеп әкімшілігі мен педагогикалық ұжым оқушыларға сапалы біліммен қатар, экологиялық сананы дамыту, туған табиғатқа деген жанашырлықты ояту жұмыстарын жүйелі түрде жүргізіп келеді. Мектеп ұжымы ұстанатын басты қағидалардың бірі – баланы табиғатты қорғауға үйрету арқылы оның азаматтық жауапкершілігін қалыптастыру.
Бұл бағытта өткізілетін әрбір ашық сабақ, әрбір шығармашылық жоба – оқушы жүрегіне сенім ұялататын, табиғатқа жанашырлықты қалыптастыратын құнды тәжірибе. «Таза Қазақстан» акциясы – бұл тек тазалықты сақтау емес, ұлттық деңгейдегі тәрбие мен мәдениетті қалыптастыруға бағытталған үлкен қадам. Шымкенттегі мектептерде, соның ішінде №65 мектеп-гимназиясында өтіп жатқан ашық сабақтар мен шығармашылық шаралар — осы бастаманың нақты жемісі. Табиғатты қорғау тек бір күндік іс-шара емес, бұл – өмірлік ұстаным. Сондықтан да осындай игі бастамалар тұрақты түрде жалғасуы керек. Бұл – таза ел, салауатты ұрпақ, жарқын болашақтың кепілі.