Шымкент қаласының әкімі Ғабит Сыздықбековтің қатысуымен кезекті көшпелі кездесу өтті. Бұл жолғы жиын Абай ауданына қарасты «Солтүстік-Батыс», «Жиделі», «Көкбұлақ» және «Тәуелсіздікке 20 жыл» шағынаудандарының тұрғындарымен ұйымдастырылды. Кездесудің басты мақсаты — тұрғындардың көкейіндегі өзекті мәселелерді анықтап, оларды шешудің нақты жолдарын қарастыру. Ашық диалог форматында өткен жиында қала тұрғындары әкімге тікелей сауалдарын қойып, өз ұсыныстарын жеткізді.
-
Тұрғындар тарапынан көтерілген негізгі мәселелер мыналар болды:
-
-
Жаяу жүргіншілер жолдарын (тротуарлар) салу
-
Шағынаудандарда жолдарды асфальттау
-
Кәріз жүйесін жаңғырту және жүргізу
-
Жер учаскелерін заңдастыру
-
Көшелерді кеңейту және жол қозғалысын реттеу
-
Жол белгілері мен жарық бағаналарын орнату
-
Балалар және спорт алаңдарын көбейту
-
Мәдениет үйі мен медициналық пункт ашу
Қоғамдық көлік бағыттарын оңтайландыру, автобус санын арттыру және жаңа аялдамалар орнату
-
Қала басшысы тұрғындардың белсенді қатысқаны үшін ризашылығын білдіріп, көптеген мәселелер сол сәтте-ақ нақты шешімін тапқанын жеткізді. Ал қосымша зерделеуді талап ететін жайттар бойынша тиісті басқармалар мен бөлімдерге нақты тапсырмалар берілді.
Ғабит Сыздықбеков тұрғындардың көтерген әрбір ұсынысы мен өтініші қаланың даму жоспары мен басымдықтарына сәйкес кезең-кезеңімен шешілетінін айтты. Оның айтуынша, қала билігі үшін халықтың өмір сүру сапасын арттыру — негізгі міндет.
Қала әкімі мұндай ашық форматтағы кездесулердің маңызы зор екенін атап өтті. Бұл — тек ақпарат алмасу ғана емес, нақты кері байланыс орнату және тұрғындармен тікелей байланыста болу. Тұрғындар тарапынан айтылған мәселелер әкімдік тарапынан жүйелі түрде қарастырылып, нақты нәтижелерге жеткізілетін болады.
Ғабит Сыздықбековтің көшпелі кездесулері — халық пен билік арасындағы диалогтың жарқын үлгісі. Мұндай кездесулер қалалық әкімдіктің ашықтығы мен есеп беруге дайын екенін көрсетеді.
Жиын қорытындысында қала басшысы барлық сұрақтар бақылауға алынатынын, ал тұрғындардың ұсыныстары алдағы даму стратегияларында ескерілетінін жеткізді.