Шымкентте экологиялық мәдениетті арттыруға бағытталған сенбілік өтті
2025 жылдың 11 қазан күні Шымкент қаласында елімізде дәстүрлі түрде өтетін «Таза Қазақстан» республикалық экологиялық акциясы аясында ауқымды жалпықалалық сенбілік ұйымдастырылды.
Аталған шараға қала тұрғындарымен қатар, Шымкент қаласы бойынша Экология департаментінің ұжымы да белсене атсалысты.
Бұл бастама — қоршаған ортаны қорғауға, экологиялық жағдайды жақсартуға және тұрғындар арасында табиғатқа деген жауапкершілікті арттыруға бағытталған.
Сенбілік барысында Экология департаментінің қызметкерлері қала аумағындағы жасыл аймақтарды, көшелер мен арық бойларын тұрмыстық қалдықтардан тазартты.
Жиналған қоқыстар арнайы полигондарға жеткізіліп, құрғақ бұтақтар мен қураған шөптер шабылды, өсімдіктерге күтім жасалды.
«Біздің негізгі мақсатымыз – табиғатты сақтау мәдениетін қоғамның әр мүшесіне сіңіру.
Тазалық тек қоқыс жинау емес, бұл – қоршаған ортаға деген қамқорлықтың, жауапкершіліктің белгісі», — деді Шымкент қаласы бойынша Экология департаментінің өкілдері.
Олардың айтуынша, мұндай іс-шаралар экологиялық саясатты жүзеге асырудың тиімді тәсілі болып табылады және қоғамда табиғатқа жанашыр көзқарасты қалыптастырады.
Биылғы «Таза Қазақстан» акциясы Шымкент қаласында кең көлемде өтті.
Қаланың барлық аудандарында мемлекеттік және жекеменшік ұйымдар, жастар ұйымдары мен тұрғындар белсенділік танытты.
Барлығы 470 мекемеден 38 мың қызметкер, сондай-ақ 83 мыңға жуық тұрғын қатысып, 127 мыңнан астам адам бір күнде қала тазалығына үлес қосты.
Жалпы 195 бірлік арнайы техника жұмылдырылып, 312 тоннадан астам тұрмыстық және құрылыс қалдықтары арнайы орындарға шығарылды.
Бұл — экологиялық мәдениетті арттыру бағытындағы ең ірі және нәтижелі іс-шаралардың бірі болды.
Экология департаменті ұжымы жыл бойы осындай экологиялық іс-шараларға жүйелі түрде қатысып келеді.
Мамандардың айтуынша, тұрақты сенбіліктер мен ағаш отырғызу акциялары қаланың ауа сапасын жақсартып, жасыл желек көлемін арттыруға сеп болады.
Сонымен қатар, департамент тарапынан қалдықтарды сұрыптау, тұрмыстық қалдықтарды қайта өңдеу және су көздерін қорғау бағытында да түсіндірме жұмыстары жүргізілуде.
«Экологиялық мәдениет – бұл тек мекемелердің емес, әрбір азаматтың күнделікті өмір салтына айналуы тиіс құндылық.
Таза қала мен салауатты қоғам өз қолымызда», — деп атап өтті департамент мамандары.
«Таза Қазақстан» экологиялық акциясы — табиғатты қорғауға, қоғамды экологиялық ойлауға тәрбиелеуге бағытталған маңызды бастама.
Шымкент қаласы бойынша Экология департаментінің белсенді қатысуы — қоршаған ортаға деген жанашырлық пен жауапкершіліктің айқын көрінісі.
Табиғатты қорғау – әрқайсымыздың ортақ міндетіміз!
Бірге таза, жасыл және жайлы Шымкент қалыптастырайық!