Жаңаруға жол бастаған Жолдау

Бүгін Мемелкет басшысы Қасым-Жомарт Тоқаев «Жаңа Қазақстан: жаңару мен жаңғыру жолы» атты кезекті Жолдауын жариялады. Жаңа Қазақстанды қарыштата дамытуды көздеп, жаңару бағытынан жаңылмай, жаңғыру жолына түскелі тұрған жұрттың бұл Жолдаудан күтері көп еді. Шындығында да «Мәңгілік елді» мұрат тұтқан елдің биік мақсаттармен үндесетін ауқымы кең, мазмұны бөлек осынау Жолдауда кемел келешекке бастайтын басты меже-міндеттер анық айқындалып, тиісінше талдап-таразыланыпты. Демек, жаңаруға жол бастайтын жаңа Жолдаудың Жаңа Қазақстанды құруға талпынып отырған тәуелсіз елдің бірлігі бекем халқына тың серпін беретіні белгілі.

Жалпы татулық пен тұрақтылықты, тыныштық пен бейбітшілікті сақтаудың бәрінен де маңызды екендігін ерекше атап көрсеткен ел Президентінің Жолдаудағы орамды ойлары, орнықты пікірлері, құптарлық көзқарастары, ұнасымды ұсыныстары алдағы уақытта кеңінен талданып, мейлінше насихатталатыны да айқын.

Әсіресе оның Қуатты Қазақстанды құру үшін күшті Парламент керектігін айтуы, Мәжілістің мәселесін көтеріп, биік мінбер төрінен табылатын «Мәслихат төрағасы» деген лауазымды енгізуді ұсынуы, жергілікті мәслихаттарға мажотиарлық сайлау жүйесінің енгілетіндігі, сайлаушылардың бірыңғай электронды базасының қалыптастырылуы, Конституциялық соттың қайта құрылуы, баспасөздің қоғамдағы рөлін көтеру үшін БАҚ туралы заңды қайта қарауды тапсыруы, т.б. жаңашылдықтар жұрт көңілінен шығып, қазірдің өзінде-ақ әлеуметтік желілерде қызу талқыға түсіп, кең қолдауға ие болып отыр.

«Жақсы да, жақсылық та жалпыға ортақ» деп мейірбан халқымыз мақалдағандай, бұл Жолдаудың жаңалыққа жаршы болып, жақсылыққа жөн сілтеуі жұрт көңіліне де қуаныш ұялатып жатыр десек, асыра айтқандық болмайды. Біздіңше, Президентіміздің Ұлттық Құрылтайды құру арқылы таяу жылдарда елдің еңсесін көтеріп, ұлттық мүдде жолында жұртты жұмылдырып, Жаңа Қазақстанды жарқын болашаққа жетелеуге талпынуы құптарлық-ақ қадам болды деп білеміз. Оған қоса, тәмам қазақтың тау тұлғасына айналған ұлттың бас ақынын ұлықтауды ұлы мақсат көріп, Абай облысының, қадым заманнан халқымыздың қасиетті мекені саналған өңірді өскелең ұрпақтың жадына мәңгі сіңіру үшін Ұлытау, Жетісу облыстарының құрылатындығын айтуы да бар аймақ тұрғындарының көңілінен шығатыны да күмәнсіз. Сонымен қатар, Қапшағайға ұлттың ұлы перзенті, даналық пен даралықтың өлшемі Дінмұхамед Қонаевтың есімін беруді қолдайтындығын ашық айтуы да азат елдің көсемінің ұлттық мұрат жолында жаңа қадамдарға, батыл бастамаларға бара алатындығын айқын көрсетіп отыр. Одан бөлек, Конституциямыздың 30-дан астам бабына өзгерістер енгізілуі керектігін баса айтуы да «халық үніне құлақ асатын мемлекеттің» Жаңа Қазақстанды сомдау саясатының жалаң ұран, сырғақ сөзден аулақ екендігін көрсетіп, ізгі бастамалардың ел игілігіне айналатындығын аңғартатыны анық-ақ.

Олай болса, баянды болашақтың бағдары іспетті жаңа Жолдауды жұртшылықтың жүрегіне жеткізе насихаттап, баршамыз бір кісідей үн қосып, біртұтас ұлт болуға белді бекем буып, береке-бірлікпен білікті басшымыздың нұсқаған жолынан табылсақ, жаңару жолы да, жаңғыру жолы да сол болмақ.

Рахымбек Камалдинов, М.Әуезов атындағы ОҚУ, ЖОО-ға дейінгі дайындық орталығының басшысы, тарих ғылымдарының кандидаты, доцент.

Добавить комментарий

Ваш e-mail не будет опубликован. Обязательные поля помечены *