ҚР Премьер-Министрінің бірінші орынбасары Роман Скляр елдегі машина жасау саласының дамуы жөнінде пікір білдірді. «Біздің болашағымыз зор. Мұнда тек автокөлік құрастыруға ғана көңіл бөлмей, мұнай-газ машинасын, энергетикалық машина жасауды да ескерген жөн. Бізде құзырет бар, онымен айналысатын адамдар бар, тиісті білім алып, осы кәсіпорындарда жұмыс істей алатын жастар бар», — деді Роман Скляр Үкімет отырысынан кейін тілшілерге берген сұхбатында. Вице-премьер мультипликативті әсер болуы қажеттігін айтты. «Бірақ ең бастысы – импорттаушы елге айналмауымыз керек, кей адамдар біз ештеңе өндіре алмаймыз және бәрін сатып аламыз деп айтады. Бірақ біз жаңа құзыреттерді үйреніп, өзімізде өндіріс ашуымыз керек», — деді Премьер-Министрдің орынбасары. Бұған дейін Роман Скляр утиль алымынан бас тарту туралы сұрақтарға жауап беріп, «мүмкін емес ештеңе жоқ» деген еді.