Қазақстан Республикасы Парламенті Мәжілісінің депутаты, Заңнама және сот-құқықтық реформа комитетінің мүшесі Қайрат Балабиев Түркістан қаласының жастарымен кездесу өткізді.
«Жеңіс» саябағында өткен кездесуге «AMANAT» партиясы Түркістан қалалық филиалының төрағасы Ғаппар Сарсенбаев, «AMANAT» партиясы Түркістан қалалық филиалының атқарушы хатшысы Сұлтанхан Таштеев және «AMANAT» партиясы Түркістан қалалық «Jastar Ruhy» жастар қанатының мүшелері қатысты.
– Қашан да еңбектің наны тәтті. Таза еңбекпен табысқа жеткен адамның күндіз күлкісі, түнде ұйқысы тыныш болады. Тынымсыз еңбек телегей табысқа жеткізеді. Жастар жастық шақта білім алып, тіл үйреніп, жан-жақты жұмыс істеп үйренсе, жалқаулыққа жол бермейді. Әркім өз мамандығын сүйсе, сүйсініп жұмыс істейді. Мамандық таңдауда жаңылмау керек. Жаңылған жағдайда да жеңілмеу керек. Қиындықтарды сабырмен және табандылықпен жеңуге тырысқан жөн, – деді Мәжіліс депутаты.
Жастар тек өз деңгейінде шектеліп қалмай, ел дәрежесінде қызмет етуі тиіс. Ашық әңгімелесу барысында Қайрат Рахымұлы қала жастарына өз өмір жолын таныстырды. Ел болашағы жастардың қолында екенін айта келе, өмірді өзгертуге арналған маңызды кеңестерімен бөлісті.
«Президенттік жастар кадрлық резерві тиімді әлеуметтік лифтіге айналды. Ол жас әрі мақсатшыл кәсіби маманға өзінің мемлекеттік басқару жүйесінде мүмкіндігін көрсетуге тағы бір мүмкіндік береді. Партиялық сайлау тізімінде 30 пайыздық квота жастардың Мәжіліс пен мәслихаттардағы өкілдерін арттырады», деді Қасым-Жомарт Тоқаев. Президент мемлекет тарапынан жастарға қандай қолдау көрсетілетіндігін де атап өткен болатын.
«Жастарды қолдау үшін тұрғын үй бағдарламалары және арнаулы жобалар жүзеге асырылуда. Мәдениет, ғылым мен білім саласында табысқа жеткен жастарға мемлекеттік сыйлық берілуде. Бүгінгі іс-шара сіздердің бастамаларыңызды және шығармашылық жоспарларыңызды жүзеге асыруға тың серпін беретіндігіне кәміл сенемін», деген еді Президент.