Бүгін аудан әкімі Арман Сәбитов тапсырмасына сәйкес Қарабұлақ ауыл округіндегі облыстық маңызы бар КХ-3 «Көксәйек- Ақсу- Шаян-Мыңбұлақ-М32» тас жолында жол кеңейту жұмыстары жүруде.
Қарабұлақ — облыстағы халық ең көп шоғырланған ауылдардың бірі. Бұл өз кезегінде ауыл орталығында көлік қозғалысын қиындатты. Бұған, әрине, «қызыл сызықта» орналасқан нысандар да әсер етеді.
Бүгінде КХ-3 «Көксәйек- Ақсу- Шаян-Мыңбұлақ-М32» автомобиль жолы бойындағы Рустемов көшесінің қиылысындағы оңға бұрылыс (кармашка) жолын ашу жұмыстары жүргізілуде.
Қазір аудан әкімінің орынбасары М.Оразалиев, ауыл әкімі және ТҮКШ, ЖК және АЖ бөлімінің басшысы
жол жөндеу жұмстарының барысын қадағалауда. Сондай-ақ, әкім орынбасары Мадияр Оразалиев заңсыз салынған нысан иелерімен сейсенбі күні кездесетінін айтты. Бүгінде «қызыл сызықта» орналасқан және заңсыз салынған нысандарды анықтау жұмыстары қарқын алды.
Қазіргі таңда Түркістан-Шәуілдір бағытындағы 64 шақырымдық жолдың 35 шақырымында жөндеу жұмыстары қарқынды жүргізіліп жатыр. Сондай-ақ, Түркістан қаласының әуежайы мен Кентау қаласын қосатын 26 шақырым жаңа жол биыл қыркүйек айында толық пайдалануға берілмек. Сонымен қатар, Сауран ауданының Қарнақ, Ойық, Шоқтас ауылдарын облыс орталығы Түркістан қаласымен қосатын және Шорнақ, Майдантал елді мекендері «Батыс Еуропа-Батыс Қытай» көлік дәлізіне шығатын 76 шақырым облыстық маңызы бар жолдарға жөндеу жұмыстары жүруде. Бүгінгі таңда 24,2 шақырымы аяқталып, қалған нысандар биыл жыл соңында толық пайдалануға беріледі.
Бұдан өзге, Түлкібас ауданының Машат, Ынтымақ, Азаттық, Шұқырбұлақ, Майтөбе бағытындағы 32,7 шақырымды құрайтын жолдарға орташа жөндеу жұмыстары жүруде. Жамбыл облысы мен Түркістан облысын байланыстыратын, сондай-ақ Созақ ауданының елді мекендерін аудан және облыс орталығына қосатын 152 шақырымдық облыстық маңызы бар автомобиль жолдарында орташа жөндеу жұмыстары жүріп жатыр. Оған қоса, Қазығұрт ауданындағы Жаңабазар, Көкібел, Жігерген елді мекендерін жалғайтын 17,9 шақырым жолда орташа жөндеу жұмыстары басталды. Сонымен қатар, Сарыағаш қаласындағы Қапланбек-Жібек жолы елді мекендерін жалғайтын 10,6 шақырым автомобиль жолына және Келес пен Шардара ауданын жалғайтын 29 шақырым жолда орташа жөндеу жұмыстары жүргізілуде. Биыл өңірде облыстық маңызы бар жолдардың бойындағы 3 көпір күрделі жөндеуден өтіп жатыр.
Айта кетерлігі, Шымкент қаласының шекарасынан басталып, Зертас, Қасқасу, Диханкөл елді мекендерінен өтетін және «Тау самалы» демалыс аймағына баратын жолдың жөндеу жұмыстары жалғасуда.