Қазақтың «Ынтымақ бар жерде – ырыс бар» деген ұлы даналығы – қоғам дамуының ең негізгі, түпкі қағидаларын айқындайтын мәнді сөз. Тарихымызға көз салсақ, елдің бірлігі мен тұтастығы оның берік тірегіне, болашақтың жарқын кепіліне айналғанын байқаймыз. Қазақ халқы қиын-қыстау замандарда, сырттан келетін қатерлерге қарсы тұруда, ішкі алауыздықтың алдын алуда тек қана ынтымақ пен бірлікке сүйеніп, өз мәдениетін, дәстүрін сақтап қалған.
Қоғамдық өмірдің ең басты негізі – адамдар арасындағы өзара құрмет пен түсіністік. Бір-бірімізге деген сенімнің артуы – елдің мықты тірегі, ал сол сенімнен ұласып келген бірлік пен татулық мемлекетіміздің тұрақтылығын қамтамасыз етеді. Егер әділеттілік пен теңдік басты орын алса, әр азамат өз еңбегінің бағаланатынын біледі, сол кезде ғана қоғамдық сенім нығая түседі. Сенім болса – бірлік, бірлік болса – бейбітшілік пен тұрақтылық орнайды.
Қазіргі таңда тәуелсіз Қазақстанымызда жүзден аса этнос өкілдері өзара татулықпен, өзара сыйластықпен, ортақ мақсат пен міндеттерді көздеп өмір сүріп жатыр. Бұл – біздің мемлекеттілігіміздің, ұлттар достығының ең үлкен жемісі. Түрлі мәдениет пен тілдің тоғысуы, олардың бір шаңырақ астында бейбіт өмір сүруі – әлемдік деңгейде таңданыс тудырған ерекше құбылыс. Қазақстан халқының осы татулығы еліміздің халықаралық аренадағы беделін арттыруда, ішкі тұрақтылығын бекемдеуде айрықша рөл атқарады.
Ата-бабаларымыздың бейбіт өмірге деген аңсары ерекше зор болды. Соғыс зардабын көрген ұрпақтың арман-тілегі – ешкімнің қауіпсіздігіне нұқсан келмейтін, тыныштық пен татулық орнаған елде өмір сүру еді. Сол арманның ақиқатқа айналуы – біз үшін зор бақыт әрі үлкен жауапкершілік. Бейбітшілікті сақтау, оны нығайту әрбіріміздің борышымыз. Бұл – мемлекеттің тұрақтылығының, ұрпақтар сабақтастығының негізі.
Ынтымақ пен татулық – еліміздің берекесі мен байлығы. Оларсыз даму мен өркендеу, рухани әрі материалдық жетістіктерге жету мүмкін емес. Елдегі тұрақтылық пен келісім – мемлекеттің ұлттық қауіпсіздігі мен стратегиялық дамуының кепілі. Әсіресе, жастар арасында осы қағидаларды насихаттап, бірлік пен достықты нығайту бүгінгі күннің басты міндеті.
«Ынтымақ бар жерде – ырыс бар» деген осы ұлы сөз әрбір қазақстандықтың жүрегінде орын алып, күнделікті өмірінің жарқын ұстанымына айналуы тиіс. Қоғамдағы әрбір ісімізде, әрбір қадамымызда осы қағида көрініс табатын болса, еліміз өсіп-өркендеп, келешегі кемел мемлекетке айналады. Баршамыздың ортақ құндылығымыз – ынтымақ пен татулық арқылы ғана еліміз баянды әрі гүлденген мемлекетке айналады.
Біз біргеміз, біз бірге күштіміз, біз бірге болашаққа сенеміз!