Бүгін Түркістанда Еңбек күні мерекесіне арналған «Адал азамат – Адал еңбек» мерекелік шарасы өтті. Салтанатты шараға Түркістан облысы әкімінің орынбасары Бейсен Тәжібаев қатысып, еңбек адамдарын құттықтады.
– Еңбек адамына деген құрмет қай кезде де ерекше. Барлық жерде еңбек адамының орны бірінші болуы керек. Қазіргі таңда еңбек адамының қоғамдағы өнегесі, бәсі биік. Қазақта «Адам еңбегімен абыройлы, мінезімен қадірлі» деген сөз бар. Осы еңбек пен мінез ұштасқан кезде қоғам да, адам да, отбасы да дамиды деп ойлаймын. Биыл Түркістан облысына 5 жыл толып отыр. Осы уақыт ішінде қала көркейіп, заманауи ғимараттар мен рухани-мәдени орталықтар салынды. Осы орайда еңбек адамдарының орны айрықша. Мерекелеріңіз құтты болсын, – деді облыс әкімінің орынбасары.
Шара барысында облыстық бақылау жөніндегі басқарма басшысы Айдос Исмайлов, Түркістан облысы кәсіподақтар орталығы» аумақтық кәсіподақтар бірлестігінің төрағасы Өмірәлі Бердіғали еңбек адамдарына деген ізгі тілегін білдірді.
Еңбек күні мерекесіне орай ұйымдастырылған «Еңбек Жолы» республикалық конкурсының Түркістан облысының өңірлік жеңімпаздары «Үздік еңбек әулеті», «Жұмыс істейтін жастардың үздік тәлімгері» және «Өндірістің үздік жас маманы» номинациясымен марапатталды. Сондай-ақ биылғы жылы зейнеткерлік жасына толатын бір топ қызметкерлерге құрмет көрсетілді. Бірқатар еңбеккерлер де марапаттан тыс қалмады.
Еңбек адамдарының құрметіне өнерпаздар әннен шашу шашып, мың бұрала биледі. Жастар флешмобы көпшілікті сүйсінтті. Айта кетейік, Еңбек күні мерекесі жұмысшы мамандықтарына құрмет көрсету дәстүрін жаңғырту, ерте жастан еңбектің маңыздылығын ұғындыру мақсатында 2013 жылдан бастап атап өтіледі.
Президент Қасым-Жомарт Тоқаев «Әділетті мемлекет. Біртұтас ұлт. Берекелі қоғам» атты Жолдауында кәсіби маманның қадірін білу керек екенін, еңбекқор адам мемлекетті дамытатынын баса айтты. «Елімізде еңбекқор адам, кәсіби маман ең сыйлы адам болуға тиіс. Осындай азаматтар мемлекетімізді дамытады. Мен Ұлттық құрылтайда және «Жастар рухының» съезінде бұған арнайы тоқталдым. Біз қарапайым еңбек адамына құрмет көрсетуіміз керек. Қандай кәсіппен айналыссаң да, оны сапалы атқару маңызды. Жастар нақты бір мамандықтың қыр-сырын жетік білуге ұмтылғаны жөн. Өз саласының шеберіне әрдайым сұраныс болады. Өскелең ұрпақ Қазақстанда ғана емес, өзге елдерде бәсекеге қабілетті болуы керек. Көрші мемлекеттің азаматтары шетелге барып, жұмыс талғамай еңбек етіп жатыр. Олар біздің елде де өте жақсы табыс тауып жүр. Дәл осындай жандардан үлгі алу керек. Шын мәнінде, ең бастысы – адал еңбек. Біз мұны жете түсінетін ұрпақ тәрбиелеуге тиіспіз. Идеология жұмысында осыған баса мән берген жөн», – деді Қасым-Жомарт Тоқаев.