Астанада «Ұлы дала жорығы» республикалық марафон бәйгесі басталды. Екінші рет ұйымдастырылып отырған сайысқа биыл 19 команда өте жақсы дайындалған. Төзімділік пен шыдамдылықты, қайсарлықты талап ететін сайыс Астана маңындағы Қаражар ауылынан басталды. Жарыс жолының қашықтығы 1300 шақырымды құрайды және бағыт Ақмола, Қарағанды, Ұлытау, Қызылорда және Түркістан облыстарын қамтиды. Марафон 19 қыркүйекте Түркістанда аяқталады.
Азаматтардың да, қазанаттардың да сыналатын жері. Осымен екінші жыл қатарынан ұйымадстырылған республикалық марафонға 19 команда жиналды. Әрқайсысында 5 спортшыдан бар. Олар 2 апта бойы 1300 шақырым жерді жүріп өтуі керек. Бұл былтырғы межеден 100 шақырымға артық. Бұған қоса, айдау жолдың да бағыты біраз өзгерген. Жалпы қатысушылар құрамы биыл 70 пайызға жаңарған. Ереже де өзгерді. Бәйге аттары 20 шақырым сайын арнайы орындарға тоқтап, суғарылуы тиіс. Әр 50 шақырым сайын мал дәрігері тексеріп отырады. Осылайша әр шабандоз астындағы атымен кемі 650 шақырым жерді жүріп өтеді. Кейін ат ауыстыруға болады. Бірақ, кей қатысушылар қазірдің өзінде бар қашықтыққа бір атпен шауып, рекорд жасауға бекініп отыр.
Жорық 14 кезеңнен тұрады. Бірінші кезеңнің қашықтығы – 50 шақырым. Одан кейін 12 кезеңде 100 шақырымды шауып өтеді. Соңғы 14-кезеңде шабандоздар 50 шақырымды бағындырып, Түркістанда мәреге жетеді. Кеше аттар ветеринариялық тексеруден өтті. Шабандоздар да дайындалған. Әр команда сапында 5 шабандоз бен 10 тұлпар бар. Марафонның жалпы жүлде қоры 65 млн. теңгені құрайды. Жеңімпаз команда 30 млн. теңге алса, екінші орынға – 20 млн. теңге, ал қола жүлдегерлерге 15 млн. теңге табысталады.
«Ұлы дала жорығы» жобасын республикалық «JORYQ» ат спорты федерациясы Қазақстан Республикасы Туризм және спорт министрлігінің, «Аманат» партиясының, ҚР Ұлттық спорт түрлері қауымдастығының қолдауымен жүзеге асырылып отыр. Жобаның басты серіктесі – Туризм және спорт индустриясын қолдау қоры.
Былтыр «Ұлы дала жорығы» байқауының финалдық кезеңінде тұлпарлар Түркістан облысының Созақ, Сауран аудандарын басып өтіп, Түркістан төрінде мәреге жеткен болатын. Бірінші орынды Маңғыстау облысының «Көкмойнақ» командасы еншілесе, екінші орынға Жетісу облысының «Жетісу» командасы ие болды. Ал үшінші орынды Түркістан облысының «Теріскей» командасы жеңіп алды. Дүбірлі дода биыл былтырғыдан да тартысты өтеді деген болжам бар.